Սիրելինե’ր, այսօր բոլորս տոնում ենք Նոր տարին, ինչի առթիվ ցանկանում եմ ձեզ շնորհավորել և օրհնել: Թո’ղ Տերը ձեզ պահպանի, հաջողություններ և գերբնական զորություն տա, որպեսզի այս տարին սկսեք հանգստության, ուրախության և խաղաղության մեջ:

Նոր տարվա տոնին ընդունված է միմյանց նվերներ տալ: Թո’ղ այսօրվա խոսքը Նոր տարվա նվեր և ուղեցույց լինի ձեզ համար: Գրված է. “Եվ հաստատ համոզված եմ սրան, թե Նա, ով ձեզանում սկսեց այս բարի գործը, կկատարի էլ մինչև Հիսուս Քրիստոսի օրը”:

Աստված յուրաքանչյուրիս կյանքում բարի գործ է սկսել: Համոզվա’ծ եղեք, որ Նա էլ մինչև վերջ կկատարի: Վստահե’ք Տիրոջը, և հավատացե’ք, որ կտեսնեք Նրա հրաշքները:

Եկեք հռչակե’նք, որ այս տարի մեզ համար ստեղծագործական տարի է, և մենք հաղթանակներ կունենանք նույնիսկ այն բնագավառներում, որտեղ մինչ օրս հուսահատություններ ենք ունեցել:

Դարձե’ք ստեղծագործող մարդիկ, ստեղծագործե’ք ձեր երջանկությունը, հաջողությունները, ընտանեկան կյանքը: Դուք ամեն բան կարող եք, որովհետև գրված է. “Ամեն բան կարող եմ ինձ զորացնող Քրիստոսով” (Փիլիպ. 4.13):

Մի’ հավատացեք հորոսկոպներին և կենդանակերպի նշաններին, այլ հավատացե’ք Հիսուս Քրիստոսին: Թո’ղ Տերը ձեզ հետ լինի, և Նրա փառքը ծագի ձեզ վրա: Ամե’ն:

***
Եթե ցանկանում եք էլ. փոստով ստանալ հովիվ Արթուր Սիմոնյանի ամենօրյա ուղերձը, մեզ գրեք newsletter@wolarm.org հասցեով:

© 2015 Word Of Liife Church | Armenia, Yerevan

Հետևեք մեզ: