Մենք հավատում ենք, որ եկեղեցու կոչումն է Ավետարանը քարոզել ոչ միայն խոսքերով, այլև բարի գործերով։ Աստծո հոգատարությունն ու կարեկցանքը մարդու հանդեպ դրսևորվում է եկեղեցու գթասիրական ծառայության շնորհիվ։

 

Մենք հավատում ենք, որ Ընդհանրական եկեղեցին ամբողջական է։ Մենք մեզ դիտում ենք Տիեզերական եկեղեցու բաղկացուցիչ մաս և հարգանքով ենք վերաբերվում մյուս քրիստոնեական եկեղեցիներին։ Կարևոր ենք համարում միջեկեղեցական հաղորդակցության պահպանումը։ Որպես սկզբունք առաջնորդվում ենք հետևյալ բանաձևով․ «Գլխավորում՝ միաբանություն, երկրորդականում՝ ազատություն, ամեն ինչում՝ սեր»։

 

Մենք հավատում ենք, որ ընտանիքն Աստծո ստեղծագործությունն է։ Ուժեղ եկեղեցու և պետության հիմքը ուժեղ ընտանիքն է։ Աստվածապաշտ ընտանիքի մոդելը, քրիստոնեական ընտանեկան արժեքները խրախուսելը կարևոր է մեր հասարակության զարգացման և բարոյական նկարագրի պահպանման համար։

 

Մենք հավատում ենք, որ ազգի առաջադիմության  համար անհրաժեշտ է քրիստոնեական հավատի, բարոյական նորմերի փոխադարձ ամուր կապը մարդկության գործունեության այնպիսի ոլորտների հետ, ինչպիսին են՝ կրթությունն ու գիտությունը, մշակույթն ու արվեստը։

 

Մենք հավատում ենք, որ եկեղեցին և պետությունը, իրենց էությամբ լինելով տարբեր կառույցներ, կանչված չեն միջամտելու միմյանց ներքին կյանքին և գործունեությանը։ Սակայն նրանց փոխգործակցությունը մի շարք բնագավառներում, օրինակ՝ խոցելի խմբերի հանդեպ հոգևոր-սոցիալական խնամքն ու աջակցությունը, հանցավոր բարքերի և արատավոր սովորույթների կանխարգելումը, քրիստոնեական բարոյականության և կրթության ապահովումը և այլն, կարող է շատ օգտակար լինել հասարակության բարօրության համար։