Products

01.01.2020 / Եվ հաստատ համոզված եմ սրանում, թե Նա, ով ձեզանում սկսեց այս բարի գործը, կկատարի մինչև Հիսուս Քրիստոսի օրը: Փիլիպպեցիներին 1.6

Սիրելինե’ր, այսօր բոլորս տոնում ենք Նոր տարին, ինչի առթիվ ցանկանում եմ ձեզ շնորհավորել և օրհնել: Թո’ղ Տերը ձեզ պահպանի, հաջողություններ և գերբնական զորություն տա, որպեսզի այս տարին սկսեք հանգստության, ուրախության և խաղաղության մեջ:
Նոր տարվա տոնին ընդունված է միմյանց նվերներ տալ: Թո’ղ այսօրվա խոսքը Նոր տարվա նվեր և ուղեցույց լինի ձեզ համար:
Հիսուսն ասաց․«Ես եմ դուռը» (Հովհ. 10։9): Ամենաէական բաներից մեկը դուռն է, որով մենք ներս ենք մտնում կամ դուրս ենք գալիս: Կան դռներ, որոնք բացվում են, և կան դռներ, որոնք փակվում են: Ո՞ւմ կամ ինչի՞ առաջ ենք դուռ բացում`մեղքի՞, թե՞ Աստծո…
Կարևորը միայն այն չէ, թե ինչ դուռ է իր կյանքում բացում մարդը, այլև այն, թե ինչ դուռ է բացում եկեղեցին իր երկրի համար: Օրհնությունների այն դուռը, որ կարող է բացել եկեղեցին, ոչ ոք չի կարող բացել:
Եվ այն դուռը, որ մենք այս տարի պետք է բացենք մեր երկրի համար՝ Ավետարանի և Խոսքի դուռն է: Եկեք լինենք մարդիկ, ում միջոցով Աստված կբացի այն:
Բացի Ավետարանի դռնից, գոյություն ունի մի բացասական դուռ՝ դժոխքի դուռը, որը բաց է շատ երկրներում, սակայն մենք կարող ենք այն փակել, եթե միայն բացենք Երկնքի դռները:
«Ես էլ ասում եմ քեզ, որ դու ես Պետրոս, և այդ վեմի վրա կշինեմ իմ եկեղեցին, և դժոխքի դռները չեն հաղթի նրան» (Մաթևոս 16.18):
Այս տարի մենք պետք է փaկենք դժոխքի դուռը և բացենք Ավետարանի ու Խոսքի դուռը, օրհնությունների ու Երկնքի դուռը մեր երկրի, մեր ընտանիքների, մեր եկեղեցու համար, և ոչ ոք չի կարողանա փակել դրանք:
Հավատքը գործողություն է։ Եկեք թակենք, և Տերը կբացի այդ դռները։ Ես հավատում եմ, որ եթե մենք լինենք համարձակ և քարոզենք Ավետարանի Խոսքը, Աստված արդյունավետ դուռ կբացի մեզ համար, և շատ պտուղ կունենանք։
«Որովհետև ամեն խնդրող առնում է, և որոնողը գտնում է, և դուռը թակողին կբացվի» (Մաթևոս 7:8):
Աստծո սերը, շնորհքն ու խաղաղությունը ամենիդ հետ լինի։ Ամեն։

01.02.2020 / Աստծո շնորհքը երևաց, որ փրկարար է ամեն մարդու համար: Տիտոս 2.11

Այսօր ոչ բոլորին է հայտնի Աստծո շնորհքի գաղտնիքը: Եթե քրիստոնյաները հասկանան, թե ինչ է շնորհքը, եկեղեցին աննկարագրելի հաջողությունների կհասնի:

Հայերենում շնորհք բառը շատ ճիշտ է գործածվում: Օրինակ՝ երբ երիտասարդն առանց աշխատելու, լավ ավտոմեքենա է վարում, ասում են, որ դա ոչ թե նրա, այլ նրա հոր շնորհքն է:

Աստծո շնորհքը մեզ տալիս է այն ամենը, ինչ չենք կարող ձեռք բերել մեր ուժերով:
Մարդկային ընդունակություններով ու կարողություններով կարելի է հասնել մեծ հաջողությունների, իսկ Աստծո շնորհքով՝ գերբնական արդյունքների:

Գրված է, որ շնորհքը փրկարար է ամեն մարդու համար, այսինքն` մենք Աստծո շնորհքով ենք փրկված, ոչ թե մեր գործերով: Ոչ ոք չի կարող իր ջանքերով հավիտենական կյանք վաստակել:

Մենք Աստծո շնորհքի կարիքն ունենք նաև մեր կյանքի մյուս բնագավառներում՝ առողջական, ֆինանսական և այլն, որովհետև շատ անգամ մեր բնական կարողություններն ու ջանքերն անզոր են՝ մեզ օգնելու: Առանց շնորհքի՝ չենք կարող նաև Տիրոջ գործերը կատարել:

Եթե դու հաջողությունների ես հասել քո ընդունակությունների և ջանքերի շնորհիվ, չես կարող ասել, որ դա Աստծո շնորհքն է: Շնորհքը գործում է, երբ գիտակցում ես, որ մարդկային ուժերով ոչինչ չես կարող անել:

Սիրելինե’ր, քննե’ք ձեր կյանքը և տեսեք, թե ինչի եք հասել ձեր ուժերով, և որտեղ է, որ Աստծո շնորհքի կարիքն ունեք: Ապավինե’ք Տիրոջը, մնացե’ք Նրա շնորհքի մեջ, որ կատարեք այն գործերը, որոնք մարդկային տեսանկյունից անհնարին են թվում:

01.03.2020 / Տիրոջ երկյուղը չարը ատել է, հպարտությունն ու ամբարտավանությունը և չար գնացքը և նենգավոր բերանը Ես ատում եմ: Առակաց 8.13

Առաջիկա օրերի ընթացքում կխոսենք Տիրոջ երկյուղի մասին, որովհետև սատանան հենց դա է ուզում գողանալ քրիստոնյաներից՝ հասկանալով դրա կարևորությունը:
Նա չի գալիս` գողանալու այն հայտնությունը, որ Քրիստոսն Աստված է, որովհետև դա արմատավորված է քրիստոնյաների սրտում, իսկ ինչ վերաբերում է Տիրոջ երկյուղին, նրանք հեշտությամբ կորցնում են: Նա ինքը, որ սկզբից հրեշտակապետ էր, կորցրեց ոչ թե Աստծո հանդեպ հավատքը (նա լավ գիտեր, որ Աստված կա), այլ՝ երկյուղը, այդ պատճառով էլ ապստամբեց Նրա դեմ:
Աստվածաշնչում գրված է, որ Տիրոջ երկյուղը չարն ատելն է: Շատ քրիստոնյաներ ասում են, թե հավատում և սիրում են Աստծուն: Եթե հավատում և սիրում ենք Աստծուն, պետք է վախենանք մեղք գործելուց:
Այսօր բազմաթիվ մարդիկ իրենց քրիստոնյա են անվանում, բայց ապրում են զանազան մեղքերի` սեռական պղծությունների, բամբասանքների, քննադատությունների մեջ: Այցելե՛ք քրիստոնեական կայքեր, ֆորումներ, և կտեսնեք, թե ինչպես են նրանք քննադատում միմյանց:
Մի հովիվ համացանցում իր կարծիքն էր գրել ինչ-որ հարցի վերաբերյալ` մեջբերելով Աստծո Խոսքը: Նա այնքան քննադատություններ էր ստացել հոգևոր եղբայրներից, որ այդ ամենը կարդալուց հետո միայն մի եզրակացության կարելի էր գալ՝ նրանք իսկապես կորցրել են աստվածավախությունը:
Գրված է, որ Տիրոջ համար ատելի է նենգավոր բերանը: Նա ատում է հպարտությունը, ամբարտավանությունը և չար ընթացքը: Ցավոք սրտի, այսօր մարդկանց մեջ այնքան հպարտություն կա: Ուշադրություն դարձրեք, թե ինչպես են մարդիկ արտահայտվում միմյանց հասցեին, որքան անարգանք կա թե՛ միմյանց, թե՛ եկեղեցու, թե՛ կառավարության հանդեպ: Տեսեք, թե ինչպես են նրանք պայքարում՝ եկեղեցում խմելը, ծխելը և մյուս մեղքերը արդարացնելու համար:
Սիրելինե՛ր, եկեք վերադառնանք աստվածավախությանը: Ատե՛նք չարը, և Աստված կօրհնի մեզ: Ամե՛ն:

01.04.2020 / Առեք իմ խրատը և ոչ թե արծաթ, և գիտությունը ընտիր ոսկուց ավելի է: Առակաց 8.10

Սրանք ոսկի խոսքեր են, որ ամեն մեկը հնարավորություն չի ունենում լսելու և ընդունելու:
Այսօր մարդիկ գալիս են Աստծուն` ավելի շատ նյութական օրհնություն ստանալու համար, քան Նրան լսելու և պաշտելու, ինչն էլ նրանց մոլորության է տանում: Սակայն Աստծո Խոսքն ասում է. «Առեք իմ խրատը և ոչ թե արծաթ…»: Սա կյանքում հաջողության հասնելու բանալիներից է:
Ամբողջ Աստվածաշունչը լի է Աստծո գիտությամբ և խրատներով, որոնք սովորեցնում են, թե ինչպես պետք է ապրել և վարվել այս կյանքում: Եթե որոշում կայացնենք՝ ապրելու այդ խրատներով, Տիրոջ օրհնությունը կգա մեզ վրա:
Տիրոջ խրատն ամենամեծ հարստությունն է, որը ձեռք բերելով և պահելով` կհասնենք շատ ավելի մեծ բաների, քան արծաթն ու ոսկին են:
Արծաթն ու ոսկին օրհնության մի մասն են: Օրհնություն ասելով` պետք է հասկանալ Աստծուց եկող ամեն բարիք:
Սիրելինե’ր, եկեք հետևենք Տիրոջը, լցվենք Նրա գիտությունով, կատարենք Նրա խրատները և շարժվենք առաջ:
Թող Աստված օրհնի ձեզ: Ամե’ն:

01.05.2020 / Որովհետև այն, որ մեռավ` մեղքին մեռավ մեկ անգամ, և այն, որ կենդանի է` Աստծուն է կենդանի: Նույնպես էլ դուք ձեր անձերը մեղքին մեռած համարեք և Աստծուն կենդանի` մեր Տեր Հիսուս Քրիստոսի ձեռքով: Սրա համար թող մեղքը չթագավորի ձեր մահկանացու մարմնի մեջ, որ հնազանդվեք նրա ցանկություններին: Հռոմեացիներին 6.10-12

Աստծո Խոսքն ասում է, որ եթե Քրիստոսի հետ կենդանացանք, ուրեմն՝ պետք է մեռած լինենք մեղքի համար և ապրենք Աստծո համար: Պողոս առաքյալը գրում է՝ թող մեղքը չթագավորի ձեզ վրա, որ չհնազանդվեք նրա ցանկություններին:
Բոլորս էլ երբևէ տեսել ենք մեռած մարդու: Ինչ էլ ասես կամ անես, նա քեզ չի լսի և չի արձագանքի: Այդպես էլ մեր անձերը պետք է մեռած լինեն մեղքի համար: Այն մեղքերը, որ աշխարհում գործել ենք, կվերադառնան մեզ մոտ, բայց մենք չպետք է դրանց տեղ տանք մեր սրտում:
Սիրելինե’ր, մենք կանչված ենք Տիրոջ փառքի, զորության և սիրո մեջ ապրելու: Սակայն մեղքը պատ է կառուցում մեր և Աստծո միջև՝ փափագելով մեզ գցել Աստծո փառքից և դժոխք տանել: Եկեք քանդենք այդ պատը և ապրենք սուրբ կյանքով:
Միգուցե կարդալով այսօրվա խոսքը՝ դու գիտակցում ես, որ քո կյանքում մեղքեր կան: Ես քեզ կոչ եմ անում, որ ապաշխարես, հեռանաս մեղքերից և դառնաս դեպի Տերը: Այդ ժամանակ իսկապես կվերապրես Տիրոջ սերն ու քաղցրությունը:
Հաղթանակը կախված է նրանից, թե ում ենք հնազանդվում. մե՞ղքն է թագավորում մեր մահկանացու մարմիններում, թե՞ Տերը:
Թող մեղքը չթագավորի ձեր մահկանացու մարմիններում: Աղոթե’ք, մաքրե’ք ձեր անձերը: Թող Տիրոջ զորությունն ապրի ձեր մեջ: Մարմինը մահկանացու է, բայց հոգին թող ապրի հավիտյան: Ամե’ն:

01.06.2020 / Սերն առանց կեղծավորության. չարն ատեք, բարիին հետևեք: Հռոմեացիներին 12.9

Հրաշալի խոսքեր են գրված Աստվածաշնչում. «Սերն առանց կեղծավորության…»: Այսօր շատերն են միմյանց ասում. «Ես քեզ սիրում եմ», բայց հենց որ նրանցից մեկը մի սխալ է թույլ տալիս, անմիջապես գալիս է ատելությունը: Դա նշանակում է, որ նրանց սերն անկեղծ չէր: Իսկական սերը չի նկատում մարդու թերություններն ու վատ կողմերը:
Կորնթացիներին ուղղված առաջին թղթի 13 գլուխն ամբողջությամբ բացատրում է, թե որն է իսկական սերը: Գրված է՝ սերը չի լրբանում, իրենը չի որոնում…
Երբ ինչ-որ մեկի հետ շփվելիս մեր շահն ենք փնտրում, նշանակում է՝ նրա հանդեպ սեր չունենք: Դա վերաբերում է նաև ամուսնությանը, երբ մարդիկ փողի համար են ամուսնանում կամ էլ նրա համար, որ իրենց մասին չասեն, թե «տանը մնաց»: Եթե ամուսնական կյանքում անկեղծ սեր լինի, երջանկություն էլ կլինի, որովհետև սերը երջանկության բանալին է:

Աստծո Խոսքն ասում է. «…չարն ատեք, բարիին հետևեք»: Հնարավոր չէ բարիին հետևել, եթե չարը չատես:
Սիրելինե’ր, մենք լավ գիտենք, թե որն է չարը: Եկեք իրականում չարն ատենք, և բարիին հետևենք, ուղղենք մեր անձերը, որպեսզի սիրո մեջ կեղծավոր չլինենք: Խոսքը վերաբերում է նաև եղբայրական սիրուն: Այդ սերը շատ մեծ է, և մենք պետք է այդ սիրո մեջ մնանք:
Աստված օրհնի ձեզ: Ամե’ն:

01.07.2020 / Որովհետև ամեն ով որ Աստծուց է ծնված, հաղթում է աշխարհին. և սա է հաղթությունը, որ աշխարհին հաղթեց, այսինքն՝ մեր հավատքը:Ա Հովհաննես 5.4

Աստծուց ծնվածը հաղթում է աշխարհին, այսինքն՝ աշխարհի հոգուն: Պատմության ընթացքում շատ մեծ մարդիկ են եղել, ովքեր հաղթել են աշխարհին, բայց չեն կարողացել հաղթել աշխարհի հոգուն և նվաճել իրենց անձը:

«Աշխարհի հոգի» ասելով՝ հասկանում ենք այն ամենը, ինչ այս աշխարհում է` մարմնի ցանկություն, աչքերի ցանկություն և ամբարտավանություն, ինչպես գրված է Հովհաննեսի առաջին թղթի 2.16-ում: Բռնցքամարտիկը կարող է հաղթանակած վերադառնալ մարտից, բայց պարտվել շնության ոգուց, նախանձից, բամբասանքից կամ այլ մեղքերից:

Հարց է ծագում` ինչպե՞ս կարելի է հաղթել աշխարհին: Գրված է. «…սա է հաղթությունը, որ աշխարհին հաղթեց, այսինքն` մեր հավատքը»:

Սիրելինե’րս, հավատքն է հաղթում աշխարհին: Քննե’ք ձեր կյանքը. դուք հաղթո՞ղ եք, թե՞ պարտվող: Մեծացրե’ք ձեր հավատքը:

Հավատքը մեծանում է Աստծո Խոսքը լսելուց: Եթե ամբողջ օրը միայն աշխարհիկ հաղորդումներ և լուրեր լսեք, ձեր հավատքը կմարի, և դուք չեք կարող հաղթել աշխարհին: Գնացե’ք եկեղեցի, լսե’ք Աստծո Խոսքը և լցվե’ք հավատքով:

Տերը օրհնի ձեզ: Ամեն:

01.08.2020 / Ներկա աշխարհիս հարուստներին պատվիրիր, որ չգոռոզանան, և ոչ էլ ունայն մեծության վրա հույս դնեն, այլ կենդանի Աստծո վրա, որ ամեն բան տալիս է մեզ առատապես վայելելու համար:Ա Տիմոթեոս 6.17

Աստվածաշունչը դիմում է ողջ աշխարհի մարդկանց, հատկապես՝ հարուստներին, որ չգոռոզանան և ոչ էլ ունայն մեծության վրա հույս դնեն: Շատ հարուստներ հպարտ են, և նրանց հույսն իրենց հարստությունն է: Բայց եթե Տերը մարդուն չօրհնի ու չպահպանի, փողը, հարստությունը կամ կապերը նրան չեն օգնի: Գրված է. «…եթե Տերը չպահպանի քաղաքը, զուր է անքուն լինում պահապանը» (Սաղմ. 127.1):

Հարուստ լինելը մեղք չէ, պարզապես չպետք է հարստությունով հպարտանալ: Մենք պետք է Տիրոջով հպարտանանք, և մեր հարստությունը պետք է Նրան ծառայի: Մենք պետք է վայելենք մեր ունեցածը, ոչ թե գոռոզանանք:

Սուրբ գիրքն ասում է. «Ես ամբարիշտը տեսա գոռոզ և տեղը հաստատ, ինչպես լայնատարած դալար ծառ, բայց մեկ էլ անցնելիս ահա չկար նա…» (Սաղմ. 37.36): Ոչ ոք չի կարող պաշտպանել մարդուն սրտի կաթվածից կամ հանկարծահաս աղետներից: Ահա թե ինչու Աստվածաշունչը զգուշացնում է, որ մեր հույսը կենդանի Աստծո վրա դնենք, որ ամեն բան տալիս է մեզ առատապես վայելելու համար:

Որոշ քրիստոնյաներ կարծում են, թե աղքատությունը բարեպաշտության նշան է: Նրանք հռչակում են այսօրվա խոսքի միայն առաջին մասը. «Ներկա աշխարհիս հարուստներին պատվիրիր, որ չգոռոզանան…»: Սակայն այս խոսքի ամբողջական իմաստն այն է, որ հարստությունը գոռոզանալու համար չէ. Տերը մեզ առատություն է տալիս, որպեսզի վայելենք և ծառայենք Իրեն, ոչ թե հպարտանանք:

Եղեք օրհնված: Ամե’ն
ԵԹԵ ԱՆՏԵՍԵՍ ՓՈՔՐ ԳՈՐԾԸ, ԵՐԲԵՔ ՉԵՍ ՀԱՍՆԻ ՄԵԾԻՆ:

01.09.2020 / Սա իմացիր, որ վերջին օրերում չար ժամանակներ կգան: Որովհետև մարդիկ կլինեն ինքնասեր, արծաթասեր, ամբարտավան, հպարտ, հայհոյիչ, ծնողներին անհնազանդ, ապերախտ, անսուրբ, անգութ, անհաշտ, բանսարկու, անժուժկալ, դաժան, անբարեսեր, մատնիչ, հանդուգն, գոռոզ, ավելի ցանկասեր, քան թե աստվածասեր: Որ աստվածապաշտության կերպարանքն ունեն, բայց Նրա զորությունն ուրացած են. նրանցից էլ ետ քաշվիր:Բ Տիմոթեոս 3.1-5

Վերջին օրերում չար ժամանակներ են գալու: Պողոս առաքյալը գրում է, որ մարդիկ լինելու են եսասեր, արծաթասեր, ամբարտավան, հպարտ, հայհոյող, ծնողներին անհնազանդ, ապերախտ, անսուրբ, անգութ, անհաշտ, բանսարկու, անժուժկալ, դաժան, անբարեսեր, մատնիչ, հանդուգն, գոռոզ, ավելի ցանկասեր, քան աստվածասեր:
Առնվազն կույր պետք է լինես, որ այսօր շուրջդ չնկատես այս ամենը: Աստվածաշունչն ասում է. “…նրանցից էլ ետ քաշվիր”, այսինքն` մի՛ ընկերացիր այդպիսի մարդկանց հետ, որովհետև նրանք կարող են քեզ շեղել ճիշտ ճանապարհից:
Խոսքը չի վերաբերում անհավատներին, այլ նրանց, ովքեր “… աստվածապաշտության կերպարանք ունեն, բայց Նրա զորությունն ուրացած են”: Միգուցե նրանք ասում են, թե հավատում են Աստծուն, բայց երբ խոսում ես Տիրոջ զորության, հիվանդների բժշկության, մեռելների հարության, վերջին ժամանակների արթնության մասին, չեն ցանկանում լսել, նույնիսկ ծաղրում են քեզ:
Սիրելինե՛ր, այս վերջին ժամանակներում շատ կարևոր է ունենալ այնպիսի ընկերներ, ովքեր լցված են Տիրոջ զորությամբ և տարածում են Նրա Խոսքը:
Եկել է ժամանակը, որ ոչ միայն ասենք, թե հավատում ենք Աստծուն, այլև քայլեք Նրա զորության մեջ, որպեսզի կարողանանք մարդկանց փրկել այն մեղքերից, որոնց մասին այսօր կարդացինք:
Եղե՛ք օրհնված: Մի՛ ուրացեք Տիրոջ զորությունը: Ամե’ն:

01.10.2020 / Ցերեկը առաջնորդեց նրանց ամպով, և ամեն գիշեր` կրակի լույսով: Սաղմոս 78.14

Հետաքրքիր է կարդալ Աստվածաշնչի նահապետների` Աբրահամի, Իսահակի, Հակոբի, Մովսեսի մասին, ովքեր իրենց կյանքի մեծ մասն անցկացրին անապատում: Մի անգամ մտածում էի՝ ինչպե՞ս կվարվեի, եթե հայտնվեի նրանց իրավիճակներում: Օրինակ՝ եթե ապրեի Մովսեսի օրերում և 40 տարի անցնեի անապատով, արդյո՞ք չէիր տրտնջա Իսրայելի ժողովրդի նման, արդյո՞ք կհասնեի Խոստացված երկիր, թե՞ մահացած կընկնեի անապատում:
Վերջերս մեծ խմբով մեկնել էինք Իսրայել: Այդ հրաշալի շրջագայությունը մեզ հնարավորություն տվեց շոշափել Ավետարանի պատմությունը, քայլել Հիսուսի և առաքյալների հետքերով: Մեկ օր նույնիսկ հյուրընկալվեցինք անապատի բնակիչների` բեդվինների մոտ` գիշերն անցկացնելով բաց երկնքի տակ:
Ես զգացի, որ անապատում չկա ոչ մի հույս կամ մխիթարություն, որից կառչելով՝ մարդը կարող է 40 տարի ապրել այնտեղ: Սակայն երբ սկսեցինք աղոթել, Աստծո ներկայությունը պարուրեց մեզ: Անապատը հանկարծ դրախտի վերածվեց մեզ համար, և ես հասկացա, որ Նրա ներկայության մեջ ոչ թե 40, այլ 80 տարի էլ կապրեի:
Նայելով երկնքին, փայլող աստղերին՝ մենք տեսնում էինք Տիրոջ փառքը: Ահա թե ինչու էին հավատքի նահապետները նայում աստղերին. սարսափելի էր հայացքդ կտրել երկնքից և քո առջև կրկին տեսնել անվերջանալի թվացող անապատը:
Սիրելինե’ր, մենք հեռու չենք այդ անապատից. աշխարհը մի մեծ անապատ է, որտեղ առանց Աստծո շատ դժվար է ապրել: Հիսուս Քրիստոսը եկավ այս աշխարհ և անապատից երկինք տանող ճանապարհ պատրաստեց մեզ համար: Ինչպես Մովսեսի օրերում Աստված առաջնորդում էր Իսրայելի ժողովրդին` ցերեկը ամպով, իսկ գիշերը` կրակի լույսով, այնպես էլ այսօր Նա առաջնորդում է մեզ:
Աղոթե’ք և խնդրե’ք Աստծո ներկայությունը: Նրա ներկայության մեջ ձեր կյանքը դրախտի կվերածվի, և դուք երջանիկ կլինեք: Ձեր հայացքը երբեք մի’ կտրեք երկնքից, այլապես այս աշխարհի իրականությունը կվախեցնի և կտրտմեցնի ձեզ: Դժվար պահերին տրտնջալու փոխարեն հավատացե°ք Աստծուն և խնդրե°ք Նրա առաջնորդությունը:
Աստված օրհնի ձեզ: Ամե’ն: